ಪುತ್ತೂರು : ಲಿಂಟಲ್‌ ಕುಸಿದು ವಿದ್ಯಾರ್ಥಿ ಮೃತ್ಯು

ಪುತ್ತೂರು : ನಿರ್ಮಾಣ ಹಂತ ದಲ್ಲಿದ್ದ ಶಾಲಾ ಬಿಸಿಯೂಟ ಕಟ್ಟಡದ ಲಿಂಟಲ್‌ (ಗೋಡೆ) ಕುಸಿದುಬಿದ್ದು ಶಾಲಾ ವಿದ್ಯಾರ್ಥಿಯೋರ್ವ ಸ್ಥಳದಲ್ಲೇ ಮೃತಪಟ್ಟ ದಾರುಣ ಘಟನೆ ನಿನ್ನೆ ಸಂಜೆ ಪುತ್ತೂರು ಪೇಟೆಯ ಹೊರವಲಯದ ಕಬಕ ಸಮೀಪದ ವಿದ್ಯಾಪುರದಲ್ಲಿ ನಡೆದಿದೆ. ಕಬಕ ವಿದ್ಯಾಪುರ ಸರ್ಕಾರಿ ಪ.ಪೂ. ಕಾಲೇಜಿನ 9ನೇ ತರಗತಿಯ ವಿದ್ಯಾರ್ಥಿಯಾದ ಬಂಟ್ವಾಳ ತಾಲೂಕಿನ ಅಳಕೆಮಜಲು ನಿವಾಸಿ ಅಬ್ದುಲ್‌ ಖಾದರ್‌ ಎಂಬವರ ಪುತ್ರ ಶಾರೂಕ್‌ಖಾನ್‌ ಯಾನೆ ಸಫ್ರಾಜ್‌ (19) ಮೃತಪಟ್ಟ ವಿದ್ಯಾರ್ಥಿ. ವಿದ್ಯಾಪುರ ಸರಕಾರಿ ಪ.ಪೂ. ಕಾಲೇಜಿನಲ್ಲಿ ಅಕ್ಷರದಾಸೋಹ ಯೋಜನೆಯ ಅಡುಗೆ ಕಟ್ಟಡದ ನಿರ್ಮಾಣ ಕಾಮಗಾರಿ ನಡೆಯುತ್ತಿದ್ದು, ನಿರ್ಮಾಣ ಹಂತದಲ್ಲಿದ್ದ ಈ ಕಟ್ಟಡದ ಲಿಂಟಲ್‌ ಕುಸಿದು ಈ ದುರ್ಘಟನೆ ಸಂಭವಿಸಿದೆ. ಗೋಡೆಯ ಮೇಲೆ ಅಳವಡಿಸಲಾಗಿದ್ದ ಲಿಂಟಲ್‌ ಮೇಲೆ ಕಲ್ಲು ಕಟ್ಟದಿರುವುದು ಮತ್ತು ಲಿಂಟಲ್‌ಗೆ ವ್ಯವಸ್ಥಿತ ರೀತಿಯಲ್ಲಿ ತಾತ್ಕಾಲಿಕ ಆಧಾರ ಸ್ತಂಭಗಳನ್ನು ಅಳವಡಿಸದೆ ಕೆಲವೊಂದು ಬಿದಿರಿನ ತುಂಡನ್ನು ಮಾತ್ರ ಅಳವಡಿಸಿರುವುದು ಈ ದುರಂತಕ್ಕೆ ಕಾರಣವಾಗಿದೆ.